Gələn il 241 gün işləyəcəyik

Əmək və Əhalinin Sosial Müdafiəsi Nazirliyinin Kollegiyasının Qərarı ilə 2026-cı il üçün iş vaxtı norması və istehsalat təqvimi təsdiq edilib.

Nazirlikdən  verilən məlumata görə, təqvim Əmək Məcəlləsi və Nazirlər Kabinetinin bayram günlərinə dair son qərarları nəzərə alınmaqla hazırlanıb.

Sənədə əsasən, 2026-cı ildə aşağıdakı tarixlər iş günü hesab edilmir:

1–2 yanvar (Yeni il), 20 yanvar (Ümumxalq Hüzn Günü), 8 mart, 20–24 mart (Novruz), 20–21 mart (Ramazan), 9 may, 27–28 may (Qurban bayramı), 28 may (Müstəqillik Günü), 15 iyun, 26 iyun, 8 noyabr, 9 noyabr, 31 dekabr.

Beşgünlük iş həftəsi üzrə 2026-cı ildə 241 iş günü, 107 istirahət günü, 19 bayram günü və 1 Ümumxalq Hüzn Günü müəyyənləşdirilib. Həmin ildə il üzrə ümumi iş vaxtı norması 1922 saat təşkil edir.

Qanunvericiliyə əsasən, gündəlik normal iş vaxtı 8 saatdan, həftəlik iş vaxtı isə 40 saatdan artıq ola bilməz. Bayramqabağı və Hüzn Günü qabağı iş günlərində iş saatı bir saat qısaldılır.

Nazirlik bildirir ki, 2026-cı il üçün istehsalat təqvimi və iş vaxtı norması qurumun rəsmi internet səhifəsində yerləşdirilib.