Ağsunun kəndlərində bəzi məktəblər acınacaqlı vəziyyətdədir - deputat

Milli Məclisin deputatı Elçin Mirzəbəyli Ağsunun bir sıra kəndlərində yeni məktəb binalarının tikilməsinə, şəhər məktəblərinin təmirinin başa çatdırılmasına və içməli su təchizatının yaxşılaşdırılmasına ehtiyac olduğunu açıqlayıb.

Deputat qeyd edib ki, Ağsunun bir sıra kəndlərində tam orta məktəb binalarının tikintisi zəruridir. Onun sözlərinə görə, kəndlərdə əhali sıxlığı yüksəkdir və məktəblərin inşası sakinlərin yaşadıqları ərazilərdə qalmasına, daxili miqrasiyanın qarşısının alınmasına da kömək edə bilər.

Mirzəbəylinin sözlərinə görə, Kəndoba kənd məktəbi də acınacaqlı vəziyyətdədir. Ağsu şəhərindəki 2 saylı məktəbdə isə uzun müddətdir davam edən təmir işləri yekunlaşmadığından şagirdlər başqa məktəblərdə təhsil almağa məcbur olurlar.

Deputat Ağsunun əsas problemlərindən birinin içməli su təchizatı olduğunu da vurğulayıb.

“Ağsunun ən böyük problemlərindən biri də adının özü ilə reallığının paradoksal olmasıdır. Yəni adında su var, amma şəhərin ən böyük problemi su problemidir”, – o bildirib.

O hesab edir ki, Ağsu şəhərinin içməli su təminatını yaxşılaşdırmaq üçün İsmayıllı rayonu ərazisindən təxminən 7 kilometrlik su kəmərinin çəkilməsi problemin həllinə kömək edə bilər.

Deputat Bakı-Oğuz-Qəbələ su kəmərinin yaxınlığında yerləşən kəndlərin də su təchizatına diqqət çəkib. Onun sözlərinə görə, Daştəmirbəyli, Çaparxlı, Qiyaslı, Ərəbuşağı, Ağalarbəyli, Abasqanlı, Qaraqoyunlu və Musabəyli kəndlərinə qısa məsafəli su xətləri çəkilməklə sakinlərin içməli suya çıxışını yaxşılaşdırmaq mümkündür.

Mirzəbəyli bildirib ki, bu problemlərin həlli yerli və regional qurumların imkanları ilə məhdudlaşmır və müvafiq səviyyədə dəstək tələb edir.