Carlsberg Rusiyadakı biznesini 320 milyon dollardan çox məbləğə satıb

Satış 2023-cü ilin iyul ayında Rusiya Prezidenti Vladimir Putinin fərmanı ilə Baltika üzərində nəzarətin müvəqqəti olaraq dövlətə verilməsindən sonra yaranan qeyri-müəyyənliyi aradan qaldıracaq.

Carlsberg Group Rusiyadan çıxmaq planını hələ 2022-ci ildə elan etmişdi və 2023-cü ilin iyununda rus zavodları üçün potensial investor tapdığını bildirmişdi. Lakin ötən ilin iyul ayında Rusiya Carlsberg-ə məxsus Baltika pivə istehsal şirkətini müvəqqəti dövlət idarəçiliyinə götürdü. Bu addım "dost olmayan” ölkələrin hərəkətlərinə cavab olaraq Moskvanın xarici aktivlər üzərində nəzarəti gücləndirdiyi siyasətin bir hissəsi idi.

Carlsberg-in rəhbəri Yakob Aarup-Andersen bu tədbirləri "aktivlərin oğurlanması” adlandırmışdı. Putinin fərmanı ilə Baltika bazar ertəsi dövlət idarəçiliyindən çıxarıldı.

Carlsberg çərşənbə axşamı Baltika-nın yerli iki menecerə satılması barədə razılığın əldə olunduğunu təsdiqlədi. Razılaşmaya görə, Baltika-nın Azərbaycan və Qazaxıstandakı aktivlərdəki payları ilə bağlı mübadilə də nəzərdə tutulur.

Carlsberg rus investorlarına Baltika-nın 98.65%-ni 34 milyard rubla, Hoppy Union-un isə 100%-ni 2 milyard rubla satacaq.

Azərbaycan və Qazaxıstandakı aktivlərin mübadiləsi (Bakı-Pivə, Carlsberg Azərbaycan və Carlsberg Qazaxıstan) həyata keçiriləcək.

VG Invest razılaşmanın dəyərinin 15%-ni federal büdcəyə ödəməlidir.

Carlsberg-dən bildirilib ki, satış həm maliyyə komponentlərini, həm də aktivlərin mübadiləsini əhatə edir. Razılaşmanın bağlanması yaxın günlərdə planlaşdırılır.

Rusiyanın şərtlərinə əsasən, ödənişlər Rusiyadan kənar bank hesablarına köçürüləcək.

Baltika və VG Invest rəhbərliyi məsələ ilə bağlı şərh verməkdən imtina edib.

 

Carlsberg aktivlərini böyük güzəşt qiymətinə satıb. Şirkətin Rusiyadakı xalis aktivlərinin 2022-ci ilin dekabrında 1,06 milyard dollar dəyərində olduğu bildirilir.

Baltika-nın 8 zavodu və 8,000 işçisi var.

Satış qərarı Carlsberg üçün hüquqi mübahisələri həll etməklə yanaşı, intellektual mülkiyyət hüquqlarını qorumağa kömək edir.