Azərbaycan Avropaya yanvarda nə qədər qaz ixrac edib?

2025-ci ilin yanvarında Azərbaycan Avropaya 1 mlrd kubmetr qaz ixrac edib. Bunu energetika naziri Pərviz Şahbazov deyib. 

“Yanvarda təxminən Avropaya 1 mlrd. kubmetr, Türkiyəyə 0,7 mlrd. kubmetr, Gürcüstana isə 0,3 mlrd. kubmetr qaz ixrac olunub. Bu dövrdə TANAP-la Türkiyəyə 0,5 mlrd. kubmetr qaz nəql edilib”, - nazir öz "X" hesabında yazıb. 

Eyni zamanda ötən ay ərzində 3,9 mlrd. kubmetr qaz hasil edilib, bunun da 2 mlrd. kubmetri ixrac olunub.

Azərbaycanda neft-kondensat hasilatı 2,3 mln. ton, ixraca nəql edilən həcmlər isə 2 mln. ton olub.

Azərbaycan 2024-cü ildə Avropaya qaz ixracını əvvəlki ilin 11,8 milyard kubmetrindən 12,9 milyard kubmetrə qədər artırıb.

Ümumilikdə qaz ixracı əvvəlki ilin eyni dövrü ilə müqayisədə 23,8 milyard kubmetrdən 25,2 milyard kubmetrə qədər artıb.

Ölkədə qaz hasilatı 2024-cü ildə 2023-cü ildəki 48,3 milyard kubmetrdən 50,3 milyard kubmetrə qədər artıb.

Bundan əvvəl Azərbaycan Prezidenti İlham Əliyev bildirib ki, 2022-ci ildən etibarən Azərbaycanın qaz ixracının coğrafiyasında ciddi dəyişikliklər baş verib. Əgər əvvəl Azərbaycan qazını 4 ölkə alırdısa indi onların sayı 12ə kimi artıb.

Gülnar Nazimqızı