Azərbaycanda minimum əmək haqqına hər il yenidən baxıla bilər

Azərbaycanda minimum əmək haqqının məbləği ildə azı bir dəfə yenidən nəzərdən keçiriləcək. Bu, Milli Məclisin bu gün keçirilən iclasında müzakirəyə çıxarılan və bir oxunuşda qəbul edilən Əmək Məcəlləsinə dəyişiklikdə əksini tapıb.

Qanun layihəsinə əsasən, minimum əmək haqqının məbləği müvafiq icra hakimiyyəti orqanının müəyyən etdiyi qurumun təklifləri əsasında, səlahiyyətli icra orqanı tərəfindən ildə bir dəfədən az olmayaraq yenilənəcək.

Rəsmi izaha görə, minimum əmək haqqı işçilərin minimum yaşayış səviyyəsinin təminində əsas sosial siyasət alətlərindən biri hesab olunur və bu məsələ beynəlxalq qurumların, xüsusilə Beynəlxalq Əmək Təşkilatının diqqət mərkəzindədir. Dünya Bankı Qrupunun “Business Ready” hesabatında isə minimum əmək haqqının dövri yenilənməsinin qanunvericilikdə məcburi şəkildə təsbit edilməməsi ölkələr üçün bal itkisi yaradan meyarlar sırasına daxil edilib.

Bu kontekstdə dəyişikliklər Azərbaycan Respublikası Baş nazirinin müavini, Biznes mühiti və beynəlxalq reytinqlər üzrə Komissiyanın sədri tərəfindən 19 fevral 2025-ci ildə təsdiqlənmiş tədbirlər planına uyğun hazırlanıb və “Business Ready” hesabatının “İşçi qüvvəsi” indikatoru üzrə mövqelərin yaxşılaşdırılmasını hədəfləyir.

Qanun layihəsinin qəbul edilməsi minimum əmək haqqının müəyyənləşdirilməsində dövriliyi təmin etməklə yanaşı, beynəlxalq hesabatlarda ölkənin bal itirməsinə səbəb olan amilin aradan qaldırılmasına imkan verəcək.

Bugün Milli Məclisin iclasında deputat Əli Məsimli təklif edib ki, minimum əməkhaqqının ən azı ildə bir dəfə müzakirə edilməsi zəruridir. 

Gülnar Nazimqızı