Yaponiya Yaxın Şərqdəki gərginlik fonunda 80 milyon barel neft ehtiyatını bazara buraxacaq

Yaponiya hökuməti Yaxın Şərqdəki müharibənin yaratdığı qlobal enerji şoklarını azaltmaq üçün 80 milyon barel neft ehtiyatını bazara buraxmaq qərarı verib. Bu barədə Reuters məlumat yayıb.

Məlumata görə, Yaponiya neft tədarükünün təxminən 90 faizini Hörmüz boğazı vasitəsilə alır.

İran və regiondakı digər ölkələrin nəzarətində olan bu strateji marşrutda ABŞ və İsrailin Tehrana hücumundan sonra yük daşımaları faktiki olaraq dayanıb.

Daha əvvəl Beynəlxalq Enerji Agentliyi (BEA) qlobal bazarda qiymətlərin kəskin artımını cilovlamaq məqsədilə 400 milyon barel neftin ehtiyatlardan buraxılmasını tövsiyə edib.

Agentliyin 32 üzv ölkəsi tərəfindən yekdilliklə təsdiqlənən bu addım təşkilat tarixində ən böyük koordinasiyalı ehtiyat buraxılışlarından biri hesab olunur.

Yaponiyanın baş naziri Sanae Takaiçi bildirib ki, ölkə benzinin və digər neft məhsullarının tədarükündə fasilələrin qarşısını almaq üçün ehtiyatlardan G7 ölkələri və BEA ilə koordinasiya olunmuş şəkildə istifadə edəcək. Onun sözlərinə görə, Yaponiya öz payına düşən ehtiyatın buraxılmasına 16 martdan başlayacaq.

Hazırda Yaponiyanın təxminən 470 milyon barel həcmində, yəni 254 günlük istehlaka bərabər strateji neft ehtiyatı var. Bunun 146 günü dövlət ehtiyatları, 101 günü özəl sektor ehtiyatları, 7 günü isə hasilatçı ölkələrlə birgə saxlanılan ehtiyatlardan ibarətdir.

Bundan əvvəl ABŞ Energetika Nazirliyi də ölkənin strateji ehtiyatlarından 172 milyon barel neftin bazara çıxarılacağını açıqlamışdı. Bu addımlar Yaxın Şərqdə artan gərginlik fonunda qlobal enerji bazarında sabitliyi qorumaq məqsədi daşıyır.

Gülnar Nazimqızı