2004-2014-cü illər ərzində Azərbaycan iqtisadiyyatına sərmayə qoyuluşlarının ümumi həcmi $180 mlrd. təşkil edib. Bu barədə prezident İlham Əliyev çərşənbə axşamı "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfransda bəyan edib.

ANN.Az "Interfaks Azərbaycan"-a istinadən xəbər verir ki, "2004-2014-cü illərdə ölkə üzrə ÜDM 3,4 dəfə, sənaye istehsalı 2,7 dəfə artıb. Bu dövr ərzində respublika iqtisadiyyatına ümumi investisiyalar $180 mlrd. təşkil edib”, - deyə İ.Əliyev bildirib.

Onun sözlərinə görə, son 11 il ərzində Azərbaycanın valyuta ehtiyatları mühüm dərəcədə artıb. "Əgər 2004-cü ildə Azərbaycanın valyuta ehtiyatları $1,8 mlrd. təşkil edirdisə, 2014-cü ilin yekunları üzrə onların həcmi $50 mlrd.-ı ötüb. İldən ilə valyuta ehtiyatlarının həcmi artır və bu gün onlar bizim üçün istənilən mümkün sarsıntılardan özünəməxsus sığorta rolunu oynayır”, - deyə prezident vurğulayıb.

Dövlət başçısı əlavə edib ki, dünya bazarlarında neftin qiymətinin ucuzlaşmasına baxmayaraq, Azərbaycan hökuməti manatın məzənnəsinin stabilliyini təmin etməyə müvəffəq oldu.