İsraildə Azərbaycan Mədəniyyət Günləri çərçivəsində “Azİz” Beynəlxalq Assosiasiyasının fəalları Rehovot şəhərinin ictimaiyyəti ilə görüşüb.

Mədəniyyət günləri Heydər Əliyev Fondunun dəstəyi ilə “Azİz” Assosiasiyası tərəfindən təşkil olunub.

Assosiasiyanın mətbuat xidmətinin verdiyi məlumata görə, görüşdə Kiryat-Ekron şəhərinin meri Xovev Tsabari, Rehovot şəhər şurasının deputatı Efim Zaika, İsrailin Miqrasiya Nazirliyinin baş direktoru Oded Forer və Bakıdan dəvət olunmuş Azərbaycan Dillər Universiteti nəzdində olan İsrail Mədəniyyət Mərkəzinin direktoru Emiliya Rzaeva iştirak edib.

İsrailliləri Azərbaycanın Xocalı şəhərində baş verən qanlı faciə ilə tanış etmək məqsədilə “Azİz” “Justice for Khojaly” sənədli səyyar fotosərgisini təşkil edib. Tədbiri beynəlxalq münasibətlər üzrə ekspert, “Azİz” idarə heyətinin üzvü Arye Qut Xocalı faciəsi barədə emosional və informativ məruzə ilə çıxış edib. O vurğulayıb ki, görünməmiş barbarlığın nümayiş olunduğu Xocalı qətliamı 20-ci əsrin ən dəhşətli faciələrindən biri olub.

“Bu faciənin bu gün nümayiş etdiyimiz qəddar və amansız səhnələri həmişəlik Azərbaycanın ürəyində sağalmaz yara olaraq qalacaq. Soyuq qış gecəsi erməni faşistləri qoca və uşaq olmasına baxmadan 613 nəfəri öldürüblər, onlardan çoxu ancaq azərbaycanlı olduğuna görə ağır əzablara, təhqirlərə və həqarətlərə məruz qalıb. Xocalı qətliamı – bütün insanlığa qarşı cinayətdir”, - deyə bəyan edib.

O qeyd edib ki, Xocalı faciəsi Ermənistanın işğal olunmuş Azərbaycan torpaqlarında apardığı etnik təmizləmə siyasətinin mərhələlərindən biri olub:

“Günahsız insanlara qarşı barbarlığın və amansızlığın izahı yoxdur. Bu dəhşətli faciə heç vaxt unudulmamalıdır”.

İştirakçıların əksəriyyəti üçün bu məlumat tamamilə yeni xəbər olub, insanlar bu dövrdə belə vəhşiliyin həyata keçirilməsindən dəhşətə gəliblər. Daha sonra Arye Qut Azərbaycan tarixi, müsəlman Şərqində ilk parlament respublikası olan Azərbaycan Demokratik Respublikası dövrü, ölkənin tarixində və mədəniyyətində yəhudilərin rolu, bugünkü möhtəşəm inkişaf, zəngin mədəniyyət, Azərbaycan iqtisadiyyatının görünməmiş inkişaf tempi barədə danışıb.

Gecənin kulminasiyası Azərbaycan klassik musiqisinin korifeyləri Üzeyir Hacıbəyovun, Qara Qarayevin, Tofiq Quliyevin əsərlərinin səsləndirildiyi Leonid Barştakın rəhbərliyi altında simli alətlər kvartetinin konserti olub. Auditoriya heyranlıqla Azərbaycan dilində ariyalar ifa edən gənc opera ifaçısı Miryam Hacıyevanın çıxışını dinləyib. Daha sonra tədbir iştirakçıları bütün dünyada tanınan şirniyyat firması “Natali”nin təklif etdiyi şirniyyatların dadına baxıblar.

ANN.Az