Aydın Mirzəzadə Tonayanın ziddiyyətli bəyanatlarını şərh etdi

Ermənistanın müdafiə naziri David Tonoyan qorxaq hərbçi və çox bacarıqsız siyasətçidir.

Bunu Oxu.Az-a açıqlamasında millət vəkili, politoloq Aydın Mirzəzadə Ermənistan müdafiə nazirinin Vyana görüşlərindən sonra Qarabağ münaqişəsinə yönəlik bir-birinə zidd olan bəyanatlarla çıxış etməsinə münasibət bildirərkən deyib.

"Birincisi, öz ordusunda real vəziyyətlə tanış olmayan, çox pis təchiz edilmiş silahlı qüvvələrə rəhbərlik edən şəxs Azərbaycanı müharibə ilə hədələmişdi. Ondan sonra Azərbaycanın müdafiə naziri onun hücumunu gözlədiyini və ona layiqli cavab veriləcəyini dilə gətirmişdi.

İkincisi, Tonoyan bu gün müdafiə naziri kimi yox, qeyri-hökumət təşkilatının rəhbəri kimi çıxış edir”, - deyən millət vəkilinin sözlərinə görə, erməni nazir unudur ki, sülh ilk növbədə işğalçı Ermənistan qoşunlarının - Tonoyanın rəhbərlik etdiyi nazirliyin tərkibinin Azərbaycan ərazisindən çıxarılmasıdır.

"O unudur ki, Ermənistan silahlı qüvvələri Xocalı  soyqırmını törədib. O unudur ki, bu gün regionda təhlükəsizliyə əsas mane olan faktor məhz Ermənistan dövlətidir. Əgər o, Azərbaycan xalqının yaddaşsızlığına və öz tarixinə hörmətsizliyinə ümid edirsə, yanılır, bu heç vaxt baş verməyəcək.

Bizim üçün sülh Ermənistanın Azərbaycan ərazisindən öz qoşunlarını çıxarmasıdır. Bizim üçün sülh Ermənistanın Azərbaycanın ərazi bütövlüyünü tanımasıdır. Əgər o, bizim xalqımız üçün sülh istəyirsə, qoy, ilk növbədə beynəlxalq hüquq normalarını diqqətlə oxusun və ərazi bütövlüyü, mehriban qonşuluq barədə təsəvvürü yaransın.

Ancaq görünən odur ki, Ermənistanın indiki rəhbərliyi bu gün Qarabağ məsələsində qəti mövqeyə malik deyil.

Bu gün həmin hakimiyyət nümayəndələri müxtəlif auditoriyalarda müxtəlif fikirlər səsləndirirlər. Ən əsası isə onların siyasəti Ermənistana heç bir halda sülh və davamlı inkişaf gətirə bilməz”, - deyə A.Mirzəzadə əlavə edib.