Prezident İlham Əliyev Özbəkistan mediasına müsahibə verib

Prezident İlham Əliyev Özbəkistanın Milli İnformasiya Agentliyinə (UzA) müsahibə verib. Dövlət başçısı Daşkənddə keçiriləcək Mərkəzi Asiya Dövlət Başçılarının Məşvərət görüşü, Azərbaycan-Mərkəzi Asiya əməkdaşlığı, eləcə də Azərbaycan-Özbəkistan münasibətləri barədə danışıb.

Əliyev bildirib ki, Azərbaycan və Mərkəzi Asiya ölkələri vahid tarixi, mədəni və coğrafi məkan yaradır və Xəzər dənizi region xalqlarını birləşdirən strateji körpü rolunu oynayır.

O, Azərbaycan-Özbəkistan əlaqələrinin ən yüksək – müttəfiqlik səviyyəsinə çatdığını, dövlət başçılarının qarşılıqlı səfərlərinin bu münasibətlərin inkişafına təkan verdiyini vurğulayıb.

Prezident Özbəkistanın Qarabağın bərpasına göstərdiyi dəstəyə və Füzulidə Mirzə Uluqbəy adına məktəbin inşasına görə təşəkkür edib.

Əliyev iki ölkə arasında ticarət dövriyyəsinin 2025-ci ilin ilk doqquz ayında 87,5 faiz artaraq 319 milyon dollara çatdığını, investisiya əməkdaşlığının və Orta Dəhliz üzrə tranzit daşımalarının da artdığını qeyd edib.