Prosineçki "Avro-2016" üçün favoritlərini açıqladı

Qol.az-ın məlumatına görə, bu sözləri Azərbaycan millisinin baş məşqçisi Robert Prosineçki "Nove TV"yə açıqlamasında deyib.

Xorvatiyalı mütəxəssis ölkəsinin yığmasının "Avro-2016"nın qrup mərhələsindəki rəqibləri haqda danışıb: "Fatih Terim istənilən komandada uğur qazana biləcəyini Türkiyə yığması ilə bir daha göstərdi. Ancaq Xorvatiyanın keyfiyyətli oyunla Türkiyəyə qalib gələcəyinə heç bir şübhə yoxdur. Bu qələbə çempionatdakı işimizi asanlaşdıra bilər. Çexiya yaxşı komanda təsiri bağışlayır, İspaniya isə "Avro-2016"nın favoritidir". 

47 yaşlı mütəxəssis "Avro-2016"da favorit gördüyü yığmaların adlarını açıqlayıb: "İspanların baş məşqçisi Visente del Boskenin böyük təcrübəsi var. Onun Fernando Torres və Xuan Mata kimi futbolçuları yığmaya çağırmaması kimlərisə təəccübləndirə bilər. Lakin İspaniya turnirin əsas favoritlərindən biridir. Eyni zamanda Almaniyanı da qeyd etmək olar. Onlar hər zaman yaxşı oyun sərgiləyirlər. Fransa meydan sahibidir və hazırda onların yüksəlişdə olduğu söylənilir. İngiltərəni də favoritlər sırasında görürəm. Onların heyətində gənc futbolçuların çıxışı xoşuma gəlir".

Prosineçki Xorvatiya millisinin baş məşqçisi Ante Çaçiçin "Avro-2016" öncəsi yoldaşlıq görüşləri üçün Moldova və San Marinonu rəqib seçməsinə də münasibət bildirib: "Məncə, yaxşı seçim oldu. Çünki millinin əksər futbolçuları ağır mövsüm keçiriblər. Belə rəqiblərə qarşı oynamaq daha asandır, nəinki Almaniya və Polşaya qarşı. Bu görüşlərdən sonra bərpa olunmaq da çətin olacaqdı".

Sonda tennisə olan marağından danışan millimizin çalışdırıcısı bunları deyib: "Tennis oyunu xoşuma gəlir. Hər zaman oynayıram. Ancaq iki ay idi ki, burada yox idim. Ona görə də oynaya bilmirdim. Çox cəlbedici və maraqlı idman növüdür".