“Qarabağ”dan püşk açıqlaması

"Bu gün püşkatma mərasimində iştirak edəndən sonra komandamızın yanına yollanacağam. Baş məşqçi Qurban Qurbanovla söhbətimiz olacaq. Əgər onun lazım bildiyi yeni futbolçular olacaqsa, bunu oturub birgə dəyərləndirəcəyik".

Bu fikirləri "Qarabağ"ın direktoru Əmrah Çəlikəl deyib.

Bu gün Nyon şəhərində avrokuboklarda növbəti mövsümün, o cümlədən "Qarabağ"ın çıxış edəcəyi Çempionlar Liqasının (ÇL) püşkü atılacaq. 

Ə.Çəlikəl bildirib ki, püşk onlardan asılı olmadığından konkret bir şey söyləmək olmur: "Hər halda, rəqibləri biz seçmirik, bizim üçün seçirlər. Bu il keçən ilki uğuru təkrarlamaq istəyirik. Yenidən qrup mərhələsinin iştirakçısı olmaq fikrindəyik. Ancaq bu dəfə daha böyük uğur qazanmaq, Çempionlar Liqasının qrupunda oynamaq istəyirik. Bunu qarşımıza hədəf kimi qoymuşuq. Buna çatmağımızda əlbəttə, püşkün də rolu böyükdür. Hansı rəqiblərin çıxacağının böyük təsiri var. İnşallah, məqsədimizə çatmaq üçün əlimizdən gələnin ən yaxşısı etməyə çalışacağıq".

 

Xatırladaq ki, "Qarabağ" bu dəfə də ÇL-də mübarizəyə birbaşa ikinci təsnifat mərhələsindən başlayacaq (sportnet.az).