Uorlik: "Qarabağ münaqişəsinin həlli ilə bağlı səylərdə Putinin iştirakını alqışlayırıq"

 "Biz Dağlıq Qarabağ münaqişəsinin dayanıqlı həllinə yönələn səylərdə Rusiya prezidenti Vladimir Putinin iştirakını alqışlayırıq”.

 

APA-nın məlumatına görə, bunu "RİA Novosti”yə açıqlamasında ATƏT-in Minsk qrupunun amerikalı həmsədri Ceyms Uorlik deyib.

 

O bildirib ki, Dağlıq Qarabağda təhlükəsizliyin təminat edilməsi məqsədi ilə orada beynəlxalq sülhməramlıların yerləşdirilməsinə həmişə münaqişənin həllinin bir hissəsi kimi baxılıb. Uorlik Rusiyanın Qarabağ nizamlanmasında zamin qismində çıxış etmək niyyətini alqışladığını bildirib.

 

Xatırladaq ki, avqustun 9-da Rusiya prezidenti Vladimir Putin ermənistanlı həmkarı Serj Sarkisyanla görüşdən sonra Rusiyanın Minsk qrupunun digər üzvləri kimi Dağlıq Qarabağ münaqişəsinin həllində zamin qismində çıxış edə biləcəyini açıqlayıb. 

 

Qeyd edək ki, Dağlıq Qarabağ münaqişəsinin müasir mərhələsi 1988-ci ildə Ermənistan SSR-in Azərbaycan SSR-ə qarşı ərazi iddiaları əsasında başlayıb.

 

1991-1994-cü illərdə Azərbaycanın Dağlıq Qarabağ ərazisi uğrunda Ermənistanla Azərbaycan arasında şiddətli müharibə baş verib. Nəticədə Azərbaycan ərazilərinin 20 faizi - Dağlıq Qarabağ və ətraf 7 inzibati rayon (Laçın, Kəlbəcər, Ağdam, Füzuli, Cəbrayıl, Qubadlı, Zəngilan) Ermənistan Silahlı Qüvvələri tərəfindən işğal olunub, 1 milyondan artıq insan qaçqın və məcburi köçkün vəziyyətinə düşüb. Hərbi əməliyyatlar 1994-cü ilin may ayında Bişkekdə Azərbaycan və Ermənistan arasında imzalanmış atəşkəs sazişi ilə başa çatıb.

 

Dağlıq Qarabağ münaqişəsinin həlli ilə ATƏT-in Minsk qrupu məşğul olur. Qrup ATƏM (1994-cü ilin dekabrında keçirilmiş Budapeşt sammitindən sonra ATƏT) Nazirlər Şurasının 1992-ci ilin 24 martında Helsinkidə keçirilmiş görüşündə yaradılıb. Qrupun üzvləri Azərbaycan, Ermənistan, Rusiya, Amerika Birləşmiş Ştatları, Fransa, İtaliya, Almaniya, Türkiyə, Belarus, Finlandiya və İsveçdir.

 

1996-cı ilin dekabrından onun Rusiya, ABŞ və Fransadan ibarət həmsədrlik institutu fəaliyyət göstərir.

 

Ermənistan qoşunlarının Dağlıq Qarabağdan qeyd-şərtsiz çıxarılması ilə bağlı BMT Təhlükəsizlik Şurasının 1993-cü ildə qısa fasilələrlə qəbul edilmiş 822, 853, 874 və 884 saylı qətnamələri, o cümlədən BMT Baş Assambleyası, AŞPA, ATƏT, İƏT və digər təşkilat və qurumların qətnamələri mövcuddur.