Məcburi köçkün tələbələr təhsil haqqı ödəyəcək? - Nazirlikdən Açıqlama
Azərbaycan prezidenti İlham Əliyev "Məcburi köçkünlər və onlara bərabər tutulan şəxslər üçün vahid aylıq müavinətin müəyyən edilməsi haqqında" fərman imzalayıb. Ölkə başçısının imzaladığı fərmandan sonra təhsil eksperti və sosial şəbəkə istifadəçiləri məcburi köçkün tələbələrinin təhsil haqqından azad edilməsilə bağlı güzəştin ləğv olunması barədə məlumat yayıblar.

ANN.Az Təhsil Nazirliyi ilə əlaqə saxlayıb. Nazirliyin İctimaiyyətlə əlaqələr sektorunun müdiri Cəsarət Valehov ANN.Az-a açıqlamasında sosial şəbəkədə yayılan məlumatlara dair heç bir şərh verməyəcəyini bildirib:
"Facebookda yazılan hər bir yazı haqqında şərh verə bilmərik. Bu, bizim işimiz deyil. Buna görə sualınızla bağlı heç bir cavab verə bilməyəcəm. Bu haqda heç bir məlumatım yoxdur".
Qeyd edək ki, prezidentin dünən imzaladığı fərmana əsasən, məcburi köçkünlər və onlara bərabər tutulan şəxslər üçün yemək xərci müavinəti, habelə kommunal və digər xidmətlər üzrə dövlət büdcəsindən ödənişlər əvəzinə 2017-ci il 1 yanvar tarixindən hər bir məcburi köçkün və onlara bərabər tutulan şəxslər üçün 36 manat məbləğində vahid aylıq müavinəti müəyyən edilib.
Məsələni diqqətdə saxlayacayıq...
Orxan Aslanlı
www.ann.az