2025-ci ildə 440 km-dən çox avtomobil yolu tikilib və təmir olunub

Azərbaycanda 2025-ci il ərzində 440,7 kilometr uzunluğunda avtomobil yolları, prospekt və küçələr tikilib, yenidən qurulub və təmir olunub. Bu barədə Azərbaycan Avtomobil Yolları Dövlət Agentliyi (AAYDA) məlumat yayıb.

Agentliyin İdarə Heyətinin sədri Saleh Məmmədov bildirib ki, Prezident İlham Əliyevin rəhbərliyi dövründə həyata keçirilən islahatlar nəticəsində Azərbaycan yol infrastrukturunun keyfiyyətinə görə MDB ölkələri arasında birinci, 141 ölkə arasında isə 24-cü yerdə qərarlaşıb.

Məlumata görə, 2025-ci ildə 110,8 kilometr respublika əhəmiyyətli, 153,1 kilometr yerli əhəmiyyətli, 93,8 kilometr Bakı şəhər yolları, 66 kilometr Gəncə şəhər yolları və 17 kilometr Şəki şəhər yolları daxil olmaqla ümumilikdə 440,7 kilometr yol təsərrüfatı yenilənib.

AAYDA-nın məlumatına əsasən, 2020-ci ildən indiyədək ümumi uzunluğu 1 338,4 kilometr olan 17 avtomobil yolu layihəsi tam, bir layihə isə qismən icra olunub. İşğaldan azad edilmiş ərazilərdə isə ümumi uzunluğu 3 720,5 kilometr olan 64 avtomobil yolu və bir hava limanı üzrə layihələr həyata keçirilir.

Hazırda ölkə üzrə 47 tunel, 447 körpü və 16 viadukun tikintisi davam edir. 2015–2025-ci illər ərzində isə AAYDA tərəfindən ümumilikdə 10 826,9 kilometr avtomobil yolu, prospekt və küçə tikilib, yenidən qurulub və təmir edilib.

Aytac