Paşinyandan şok etiraf: Bakıya elə bir şans verdi ki!

Bu sözləri Axar.az-a açıqlamasında politoloq İlqar Vəlizadə deyib. Ekspert bildirib ki, əslində Paşinyanın Dağlıq Qarabağ məsələsinə reallıqdan uzaq yanaşma tərzi Minsk Qrupunu, xüsusilə də Rusiyanı pis vəziyyətdə qoydu:

"Paşinyanın Rusiyada Dağlıq Qarabağın və ətraf rayonların Ermənistana birləşdirilməsini istisna etməməsi açıq-aşkar Azərbaycan torpaqlarını mənimsəmək niyyətidir. Belə bir niyyət ancaq işğalçı dövlətin rəhbəri tərəfindən dilə gətirilə bilərdi. Paşinyan son hərəkəti ilə bütün sələflərinin və özünün işğalçılıq siyasətini ifşa etdi. Bu, Azərbaycana münaqişənin tənzimlənməsi istiqamətində geniş imkanlar açır. Beynəlxalq ictimaiyyət zaman-zaman Azərbaycanın külli miqdarda silahlar alması və bununla da müharibəyə hazırlaşmasına dair narahatlıq ifadə edirdi. Hesab edirəm ki, Azərbaycan Ermənistanın Azərbaycan torpaqlarına göz dikməsi faktı ilə bu narahatlıqlara son qoya bilər. Danışıqlar prosesi isə onsuz da nəticə vermir. Prosesi dalandan çıxarmaq üçün hər cür imkandan, o cümlədən hərbi yoldan istifadə edə bilərik”.

Politoloqun sözlərinə görə, Bakı İrəvanın Qarabağla bağlı mövqeyini mütləq beynəlxalq ictimaiyyətin diqqətinə çatdıracaq:

"Bu yaxınlarda Rusiya Prezidenti Vladimir Putinin Azərbaycana səfəri gözlənilir. Eyni zamanda, Fransa prezidentinin də ilin sonuna qədər Azərbaycana səfəri istisna edilmir. Hər iki dövlət Minsk Qrupunun həmsədridir. Əminəm ki, Paşinyanın Bakıya başqa yol qoymadığı və torpaqlarımızı hərbi yolla qaytarmağa hazır olduğumuz Moskva və Parisə bildiriləcək. O da bəllidir ki, belə bir vəziyyətdə tərəflərin hansısa arqumentləri olmayacaq. Çünki Ermənistanın açıq faşist və işğalçı siyasətinə qarşı mübarizənin başqa metodu yoxdur”.