Azərbaycan beynəlxalq ikili diplom proqramları üçün seçim qaydalarını təsdiqləyib

Azərbaycan hökuməti beynəlxalq ikili diplom proqramlarının həyata keçiriləcəyi xarici tərəfdaş ali təhsil müəssisələrinin, ixtisasların və təhsil səviyyələrinin seçimini tənzimləyən yeni qaydaları təsdiqləyib.

Nazirlər Kabinetinin mətbuat xidmətindən verilən məlumata görə, müvafiq qərarı Baş nazir Əli Əsədov imzalayıb. Qayda ikili diplom proqramları çərçivəsində tərəfdaş xarici universitetlərin və təhsil proqramlarının seçilməsi üçün meyar və prosedurları müəyyən edir.

Sənədə əsasən, xarici tərəfdaş ali təhsil müəssisəsi “Times Higher Education”, “QS World University Rankings” və “Shanghai Ranking” kimi beynəlxalq reytinq sistemlərindən ən azı ikisində yer almalıdır. Həmin ali məktəbin verdiyi bakalavr, magistr və doktorluq dərəcələri fəaliyyət göstərdiyi ölkənin müvafiq dövlət və akkreditasiya qurumları tərəfindən tanınmalıdır. Eyni zamanda, tərəfdaş universitet proqramın icrası üçün əlavə infrastrukturun maliyyələşdirilməsi ilə bağlı tələblər irəli sürməməlidir.

İxtisasların və təhsil səviyyələrinin seçimi isə Azərbaycanın sosial-iqtisadi inkişaf prioritetlərinə uyğunluq, yerli ali təhsil müəssisələrinin maddi-texniki bazasının yetərli olması və kadr hazırlığının bakalavriat, magistratura, doktorantura, eləcə də baza ali tibb təhsili səviyyələrində aparılması meyarları əsasında həyata keçiriləcək.

Qaydalara görə, beynəlxalq ikili diplom proqramları Elm və Təhsil Nazirliyi ilə razılaşdırılmış müqavilə əsasında icra olunacaq. Müqavilədə proqramın idarə olunması üçün rəhbər komitənin yaradılması, tədrisin təşkili, proqramın ən azı 70 faizinin yerli ali təhsil müəssisəsində keçirilməsi, xarici müəllim heyətinin cəlb edilməsi, tələbə seçimi və qiymətləndirmə mexanizmləri kimi əsas şərtlər əksini tapmalıdır.

Tələbələrin seçimi bakalavriat, magistratura və baza ali tibb təhsili səviyyələri üzrə Dövlət İmtahan Mərkəzinin qəbul imtahanlarının nəticələrinə, doktorantura səviyyəsi üzrə isə mövcud qaydalara uyğun aparılacaq. Maddi-texniki imkanlar olduqda, yüksək göstəricilərə malik tələbələr ödənişli əsaslarla da proqrama cəlb oluna biləcəklər.

Əcnəbilərin və vətəndaşlığı olmayan şəxslərin proqrama qəbulu isə mövcud qanunvericiliyin tələblərinə uyğun və yalnız ödənişli əsaslarla həyata keçiriləcək. Proqram üzrə qəbul şərtləri yerli ali təhsil müəssisələrinin rəsmi internet səhifələrində dərc ediləcək.