Azərbaycan Respublikasının ordusu ən güclülər sırasındadır

Azərbaycan Ordusunun Təlim və Tədris Mərkəzində "İlham Əliyev-sərkərdəlik faktoru” mövzusunda dəyirmi masa keçirilib.
 
Müdafiə Nazirliyinin mətbuat xidmətindən bildiriblər ki, əvvəlcə Ulu Öndər Heydər Əliyevin, Azərbaycanın müstəqilliyi və ərazi bütövlüyü uğrunda canından keçmiş şəhidlərimizin xatirəsi bir dəqiqəlik sükutla anılıb.
 
Tədbirdə İdeoloji İş və Mənəvi-Psixoloji Təminat İdarəsinin rəisi vəzifəsini icra edən polkovnik Elşad Əbilov və digər çıxış edənlər Ümummilli Lider Heydər Əliyevin ordu quruculuğu istiqamətində apardığı siyasətin hazırda Prezident, Müzəffər Ali Baş Komandan İlham Əliyev tərəfindən uğurla davam etdirildiyini bildiriblər.
 
Bu gün Azərbaycan Ordusu yeni inkişaf mərhələsinə qədəm qoyub. Müasir standartlara cavab verən hərbi infrastrukturun yaradılması, şəxsi heyətin sosial-məişət şəraitinin yaxşılaşdırılması, eləcə də ordumuzun müasir silahlarla təminatı istiqamətində görülən işlər sayəsində Azərbaycan Ordusu ən güclü ordular sırasındadır. Vətən müharibəsində Azərbaycan Ordusu gücünü və nəyə qadir olduğunu bütün dünyaya bir daha sübut etdi.
 
Sonda iştirakçılara "Vətən müharibəsi tarixi. Şəxsiyyət faktoru” kitabı təqdim olunub.

www.anews.az