Qazaxıstan BTC ilə neft tranzitinə başlamayıb - KazTransOil

"Fevralın 7-də "KazTransOil" SC Ceyhan dəniz terminalında yükləmə əməliyyatlarının müvəqqəti dayandırılması ilə əlaqədar fors-major hallar barədə bildiriş alıb. Bununla əlaqədar olaraq, neftin Aktau limanından boru xətti ilə nəqli həyata keçirilmir", - məlumatda deyilir.

 

Öz növbəsində, TengizChevrOil" baş direktoru Kevin Lyon çərşənbə axşamı qeyd edib ki, "KazMunayQaz"ın Bakı-Tbilisi-Ceyhan marşrutu üzrə "Tengizşevroyl"un ehtiyatlarından həyata keçirəcəyi ixrac Türkiyədəki zəlzələ nəticəsində uğursuz olub. O əlavə edib ki, hazırda sınaq daşımalarına başlamaq mümkün deyil, ona görə də marşrut hələ işə salınmayıb.

Neft ixrac marşrutlarının şaxələndirilməsi məqsədilə Qazaxıstan BTC ilə neft ixracına başlanmasına dair Azərbaycanla razılıq əldə edib.

"Xüsusən, Bakı-Tbilisi-Ceyhan vasitəsilə indi bizim bu istiqamətdə gələn il yanvarın 1-dən 1,5 milyon ton neftin göndərilməsi və onun həcminin  6-6,5 milyon tona  çatdırılması barədə razılaşmamız var", - Qazaxıstanın baş naziri Əlixan Smailov ötən ilin sonunda bildirib.

Hazırda BTC neft kəməri ilə "Azəri-Çıraq-Günəşli” yataqlar blokundan hasil edilən neft və "Şahdəniz” yatağından çıxarılan  kondensat nəql olunur. BTC ilə Xəzər regionunun bir sıra digər ölkələrindən hasil edilən neft və kondensat da dünya bazarına çatdırılır. 

Fevralın 6-da səhər tezdən Türkiyədə baş vermiş zəlzələdən sonra Bakı-Tbilisi-Ceyhan neft kəmərinin Türkiyə hissəsinin operatoru Ceyhan terminalından neftin tankerlərə yüklənməsi işlərini müvəqqəti dayandırmışdı.

 

BP-nin məlumatına görə, bu əməliyyatlar fevralın 12-də bərpa edilib. Şirkət yaxın gələcəkdə Ceyhan terminalından neftin tankerlərə yüklənməsi əməliyyatlarının əvvəlki rejimə qayıdacağını proqnozlaşdırır. Bakı-Tbilisi Ceyhan neft kəmərinin Türkiyədəki obyektlərində, o cümlədən kəmərin özündə, nasos stansiyalarında və s aparılan yoxlama zamanı zəlzələ nəticəsində ciddi dağıntı aşkar etməyib.

Kəmərin ötürmə qabiliyyəti ildə 50 milyon tondan artıq neft ixrac etməyə imkan verir.  BTC layihəsinin səhmdarları  BP (30,1%) Azərbaycan Dövlət Neft Şirkəti (25%), MOL (8,9%), Equinor (8,71%), TPAO (6,53%), ENI (5%), ExxonMobil (SPB) : XOM) (2,5%), Itochu (3,4%), INPEX (2,5%), TotalEnergies (SPB: TOT) (5%) və ONGC Videsh (2,36%) şirkətləridir.