Sülh imzalandığı təqdirdə Azərbaycandan qaz ala bilərik - Ermənistanın baş naziri

 

"Biz Rusiyadan,İrandan qaz idxal edirik. Əgər iki ölkə arasında sülh yaranarsa Ermənistan Azərbaycandan qaz ala bilər", -  baş nazir bildirib. 

 

Bundan əvvəl sülh müqaviləsi imzalanacağı təqdirdə Ermənistanın Azərbaycandan qaz alması məsələsi bir neçə dəfə iki ölkənin rəsmi şəxsləri tərəfindən səsləndirilib. 

 

Ermənistan hazırda Rusiyadan qaz alır və onu elektrik enerjisi müqabilində İrandan da alır.

Ermənistanda ümumi enerji təchizatının 57 faizi təbii qaz, 20 faizi nüvə yanacağı, 11 faizi bərpaolunan enerji mənbələri, 10 faizi neft və 2 faizi kömür və digər mənbələr hesabına həyata keçirilir. Ölkədə təsdiqlənən neft və ya təbii qaz ehtiyatları yoxdur və ölkə idxaldan asılıdır (ümumi enerji təchizatının 65-70 faizi). Neft və neft məhsulları əsasən Gürcüstan, İran, Rusiya və bəzi Avropa ölkələrindən idxal olunur. Təbii qaz Rusiyadan Gürcüstan ərazisindən tranzit keçən boru kəməri ilə və elektrik enerjisi əvəzinə barter müqaviləsi əsasında İrandan idxal olunur. Eyni zamanda, nüvə yanacağının da Ermənistan üçün əsas təchizatçısı Rusiyadır.
 
Ermənistana qaz təchizatı əsasən 2 boru kəməri vasitəsilə həyata keçirilir: İran-Ermənistan qaz kəməri və Rusiya-Gürcüstan-Ermənistan boru kəməri. İran-Ermənistan qaz kəməri Ermənistanın qaza olan tələbatını (illik 2,3-2,5 milyard kubmetr) təxminən 2 qatı həcmində ölkəni qaz ilə təmin etmək gücünə malikdir. İstifadəyə verildiyi ilk illərdə İran təbii qazı ilə Ermənistan elektrik enerjisi barter olunurdu. Lakin ölkənin qaz təchizatının Rusiya şirkətinin inhisarına keçməsi İran qazına olan marağı azaldıb.

 

Gülnar