Rusiya Qazaxıstanla "ticarət müharibəsi" elan edib

Rosselxoznadzor Qazaxıstan Kənd Təsərrüfatı Nazirliyinin Aqrosənaye Kompleksi üzrə Dövlət İnspeksiya Komitəsinə 7 oktyabr 2024-cü il tarixindən etibarən respublikada yetişdirilən təzə qovunlara fitosanitar sertifikatların verilməsinin dayandırılması xahişi ilə müraciət edib. Bu barədə İnterfaks məlumat yayıb.

"Qərar, keçmiş illərdə və cari ildə Rusiyaya idxal edilən qazaxıstan qovunlarında karantin obyekti – qovun milçəyinin (Myiopardalis pardalina (Bigot)) dəfələrlə aşkarlanması və Rusiyanın fitosanitar təhlükəsizliyinin qorunması məqsədilə qəbul edilib," - Rosselxoznadzor bildirib.

Qurum artıq hesablayıb ki, "qovun milçəyinin daxil olması və yayılması nəticəsində potensial iqtisadi zərər 250 milyon rubldan çox ola bilər."

Məlumata görə, 2024-cü ildə Qazaxıstandan Rusiyaya idxal edilən karantin altına alınmış məhsulların, xüsusilə meyvə-tərəvəz məhsullarının həcmi xeyli artıb. Ümumi idxalın 17%-dən çoxunu Qazaxıstan Kənd Təsərrüfatı Nazirliyinin Aqrosənaye Kompleksi üzrə Dövlət İnspeksiya Komitəsi tərəfindən sertifikatlaşdırılan təzə qovunlar təşkil edir.

Bu həftənin əvvəlində məlumat verilmişdi ki, Rosselxoznadzor Qazaxıstana bir sıra kənd təsərrüfatı məhsullarının, o cümlədən taxıl, pomidor, bibər və günəbaxan toxumlarının Rusiyaya ixracının müvəqqəti olaraq dayandırılması tələbi ilə müraciət edib. Qurum müraciətində tez-tez zərərvericilər və xəstəlik törədən mikroorqanizmlərin aşkar olunmasını səbəb kimi göstərib. Bununla əlaqədar olaraq, Rosselxoznadzor Qazaxıstan Kənd Təsərrüfatı Nazirliyindən bu məhsulların Rusiyaya ixracı üçün fitosanitar sertifikatların verilməsini müvəqqəti olaraq dayandırmağı xahiş edib. 

N.Təbrizli