Ağstafa sakini qanunsuz azadlıqdan məhrumetməyə görə həbs olunub

Ağstafa rayon sakini, 48 yaşlı Etibar Əliyev bir şəxsi qanunsuz olaraq azadlıqdan məhrum edib məcburi əməyə cəlb etdiyi üçün 6 il müddətinə azadlıqdan məhrum edilib.

Məlumata görə, 2022-ci ilin aprelində Etibar Əliyev maddi çətinlik yaşayan Yaşar Əliyevə iş vəd edərək onu fermasına aparıb.

Daha sonra onun şəxsiyyət vəsiqəsi, hərbi bileti və müavinət kartını əlindən alıb, onu yararsız tikilidə yerləşdirib və hər gün mal-heyvana baxmağa məcbur edib. Onun qaçmasına imkan verilməyib, döyülüb və ac saxlanılıb.

Daxili İşlər Nazirliyinin İnsan alverinə qarşı mübarizə baş idarəsinin əməkdaşları Yaşar Əliyevi azad ediblər.

Etibar Əliyev məhkəmədə ittihamları qəbul etməyib, guya zərərçəkənə maaş verdiyini və onun sərbəst hərəkət etdiyini bildirib. Lakin Yaşar Əliyev məhkəmədə zorla saxlandığını və döyüldüyünü təsdiqləyib.

Məhkəmə Etibar Əliyevi Azərbaycan Cinayət Məcəlləsinin 144.2.1-ci maddəsi üzrə təqsirli bilərək 6 il həbs cəzası verib.

N.Təbrizli