Azərbaycan Respublikasının Qida Təhlükəsizliyi Agentliyi (AQTA) Almaniya, ABŞ, Yaponiya və daha 15 ölkənin qida təhlükəsizliyinə nəzarət sistemlərinin ekvivalentliyini tanıyıb. Bu barədə qurumun mətbuat xidməti məlumat yayıb.
Qərara əsasən, adıçəkilən ölkələrdən yüksək riskli qida məhsulları idxal edən müəssisələr Azərbaycana əlavə qiymətləndirmə aparılmadan məhsul ixrac edə biləcəklər.
AQTA bildirir ki, tanınma, həmin ölkələrin səlahiyyətli qurumları tərəfindən təqdim olunan təsdiq sənədlərinə əsasən həyata keçiriləcək. Əvvəlcədən aparılmış qiymətləndirmələr və ticarət zamanı müşahidə olunan uyğunsuzluqlar nəzərə alınıb.
Ekvivalentlik tanındıqdan sonra insan və heyvan sağlamlığı üçün təhlükəli məhsulların təkrar ixracı və ya sistem uyğunsuzluğu halları baş verdiyi təqdirdə, qərarın ləğvi Agentliyin Kollegiyasında müzakirəyə çıxarılacaq.
Agentlik, bu qərarın Azərbaycan ilə müvafiq ölkələr arasında qida məhsulları ticarətinin genişlənməsinə töhfə verəcəyini bildirib.
Foto
Video
