Qurban Qurbanov Böyükağa Hacıyevi geridə qoydu

İxtisaslaşmış “coachworldranking.com” portalı klublarda çalışan baş məşqçilərin illik reytinq siyahısını dərc edib. Lent.az-ın məlumatına görə, siyahı 2013-cü ilin 52 həftəsi ərzində klubların keçirdiyi rəsmi matçların nəticələrinə əsasən hesablanıb. 1329 baş məşqçinin yer aldığı cədvələ 2 azərbaycanlı mütəxəssis də daxil edilib. Bunlar Qurban Qurbanovla Böyükağa Hacıyevdir. “Qarabağ”ın baş məşqçisi ili 715 xalla 704-cü pillədə başa vurub. Qurbanov 2012-ci illə müqayisədə 2 pillə geriləyib. Hacıyev isə 38 xalla 1281-ci pillədə qərarlaşıb. “Neftçi”nin sabiq baş məşqçisinin mövqeyində də 1 pillə eniş baş verib. Siyahıda Topaz Premyer Liqası klublarının hazırkı baş məşqçilərindən Kaxaber Tsxadadze də var. Bakı “İnter”inin baş məşqçisi 339 xalla 926-cıdır. Gürcüstanlı mütəxəssis 2012-ci ilə nəzərən 2 pillə irəliləyib. Mövsümün ilk yarısında “Xəzər Lənkəran”ın baş məşqçi postundan istefa vermiş Con Toşak siyahıda 2 pillə irəliləyib. Uelsli mütəxəssis hazırda 100 xalla 1193-cüdür. Lənkəran klubunun daha bir sabiq baş məşqçisi, hazırda Belçika “Gent”inə rəhbərlik edən Mirça Rednik isə 1 pillə irəliləyərək, 2261 xalla 257-ci mövqedə qərarlaşıb. Qeyd edək ki, reytinq cədvəlinə İngiltərənin “Çelsi” klubunun baş məşqçisi Joze Mourinyo 15174 xalla başçılıq edir. İspaniya “Atletiko”sunun sükanı arxasındakı Dieqo Simeone 13384 xalla 2-ci, hazırda “Barselona”ya rəhbərlik edən Xerardo Martino isə 11993 xalla 3-cüdür.ANN.Az