Ksenia Sobçak Səfərov qardaşlarının ölümünə etiraz edib

Rusiyalı jurnalist Ksenia Sobçak Yekaterinburqda azərbaycanlı iki qardaşın ölümündən sonra Rusiya və Azərbaycan arasında yaranan gərginliyə münasibət bildirib.

O, şəxsi Telegram kanalında yazıb ki, azərbaycanlı qardaşların meyitlərinin fotoları mediada yayılıb və “bədənlərində demək olar ki, salamat yer qalmayıb”.

Sobçak xatırladıb ki, Rusiya İstintaq Komitəsi ölənlərdən birinin ölüm səbəbini “ürək çatışmazlığı” kimi təqdim edir.

“Adam hələ məhkəmə tərəfindən təqsirli bilinməyibsə, heç bir halda onun işgəncəyə məruz qalması qəbulolunmazdır. Onun milliyyəti, vətəndaşlığı və ya nədə şübhəli bilinməsi vacib deyil,” – Sobçak qeyd edib.

Onun fikrincə, hüquq-mühafizə orqanlarının bəzi əməkdaşlarının hərəkətləri beynəlxalq qalmaqala səbəb olub. “Sonra da təəccüblənirik ki, bizi niyə orada sevmirlər, saxlayırlar və gözləmirlər,” – o vurğulayıb.

N.Təbrizli