Azərbaycan və GICHD minatəmizləmə əməkdaşlığını genişləndirməyə hazırdır

Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyov İsveçrədə Cenevrə Beynəlxalq Humanitar Minatəmizləmə Mərkəzinin (GICHD) direktoru, səfir Tobias Privitelli ilə görüşərək iki qurum arasında minatəmizləmə sahəsində uzunmüddətli əməkdaşlığın genişləndirilməsi imkanlarını müzakirə edib.

Görüşdə Azərbaycan ərazisində mina və partlamamış sursat probleminin miqyasına dair məlumat verilib.

Rəsmi statistikaya əsasən, 2020-ci ildən bəri minalar 350-dən çox insanın ölümünə və yaralanmasına səbəb olub, bu isə region üzrə ən yüksək göstəricilərdən biridir. Əmirbəyov bildirib ki, Azərbaycan dövləti son illərdə minatəmizləmə əməliyyatlarının sürətləndirilməsi üçün maliyyə, texniki və insan resurslarını əhəmiyyətli dərəcədə artırıb.

Tərəflər 2025-ci il 7 iyul tarixində ANAMA və GICHD arasında imzalanmış Anlaşma Memorandumunun həyata keçirilməsi mexanizmlərini, o cümlədən Göygöl Təlim Mərkəzində birgə təlimlərin təşkili imkanlarını müzakirə ediblər.

Privitelli Azərbaycanın minatəmizləmə fəaliyyətini “ciddi və məqsədyönlü” adlandıraraq, GICHD-nin praktiki əməkdaşlığı dərinləşdirməyə hazır olduğunu bildirib. O, gələn həftə Azərbaycana planlaşdırdığı səfər zamanı konkret əməkdaşlıq istiqamətlərinin müəyyənləşdiriləcəyini qeyd edib.

Əmirbəyov isə səfərin ikitərəfli münasibətlərə töhfə verəcəyini deyərək, Privitelliyə işğaldan azad edilmiş ərazilərdə minalarla çirklənmə səviyyəsi və aparılan əməliyyatlarla yerində tanış olmaq üçün bölgəyə səfər etməyi tövsiyə edib.

Aytac