İran MAQATE ilə əməkdaşlığı dayandırdı, Qrossi persona non grata elan edildi

İran Prezidenti Məsud Pəzəşkian Beynəlxalq Atom Enerjisi Agentliyi (MAQATE) ilə əməkdaşlığın dayandırılması haqqında qanun imzalayıb.

İran parlamentinin məlumatına görə, ölkənin xarici işlər naziri Abbas Əraqçi MAQATE rəhbəri Rafael Qrossinin İranda arzuolunmaz şəxs elan edildiyini bildirib.

Tehran MAQATE-ni İranın nüvə proqramı ilə bağlı “müəmmalı və siyasi motivli” mövqedə ittiham edir.

İran rəsmiləri illərdir nüvə obyektlərinə beynəlxalq nəzarətçilərin buraxıldığını, lakin konkret və qərəzsiz nəticələrin ortaya qoyulmadığını deyirlər.

"Əgər bu qədər şəffaflığa baxmayaraq hələ də qərarsızdırlarsa, əməkdaşlığın mənası nədir?" — prezidentin müşavirlərindən biri bildirib.

Pəzəşkian parlamentdəki radikalların nüvə silahlarının yayılmaması üzrə müqavilədən (NPT) çıxmaq çağırışlarına baxmayaraq, ölkə rəhbərliyini daha praqmatik yanaşmaya razı sala bilib.

N.Təbrizli