Tramp Avropa ilə ticarət danışıqlarında irəliləyiş olduğunu bildirib

ABŞ prezidenti Donald Tramp bazar ertəsi Avropa İttifaqı ilə aparılan ticarət danışıqlarında ciddi irəliləyişin əldə olunduğunu və İndoneziya ilə böyük bir ticarət sazişinin bağlandığını açıqlayıb.

“Avropa İttifaqı ilə danışıqlar aparırıq və real irəliləyiş əldə olunub. Əslində, razılaşmalar artıq var,” –  Tramp bildirib.

O, Avropa Komissiyasının rəhbəri Ursula fon der Lyayenə Aİ mallarına qarşı planlaşdırılan gömrük rüsumları ilə bağlı göndərilən bildirişi “Aİ ilə saziş” kimi qiymətləndirib.

Tramp əlavə edib ki, İndoneziya ABŞ-a bütün sahələr üzrə tam bazar çıxışı verib və yalnız ABŞ-a idxal olunan İndoneziya məhsullarına 19% gömrük rüsumu tətbiq ediləcək.

Razılaşmaya əsasən, İndoneziya ABŞ-dan 15 milyard dollarlıq enerji resursları, 4,5 milyard dollarlıq kənd təsərrüfatı məhsulları və 50 ədəd Boeing təyyarəsi alacaq.

N.Təbrizli