Haker hücumu "Aeroflot"a milyardlarla rubl ziyan vurub

 Rusiyanın milli aviadaşıyıcısı “Aeroflot”un IT infrastrukturunda baş verən kütləvi nasazlıq şirkətə milyardlarla rubl ziyana başa gələ bilər. Sənaye mənbələri bu hadisəni mümkün haker hücumu ilə əlaqələndirirlər.

Yalnız  iyulun 28-də Şeremetyevodan həyata keçirilməli olan 108 reysin ləğvi şirkətə azı 250 milyon rubl ziyan vurub. İT sistemlərinin bərpası üçün lazım olacaq vəsait və yaxın tarixlərə bilet satışlarının dayanması səbəbindən ümumi itkilərin milyardlarla rubla çata biləcəyi bildirilir.

Ekspertlər minlərlə fiziki və virtual serverin tam silinməsini inandırıcı hesab etməsələr də, sistemlərin bərpasının bir neçə gün və ya aylarla çəkə biləcəyini qeyd edirlər. "Aeroflot" əlavə olaraq kiberinsidentin nəticələrini aradan qaldırmaq və araşdırma aparmaq üçün ixtisaslaşmış agentlik cəlb edəcək.

İyulun 29-u üçün daha yeddi reys — o cümlədən Moskva-Ufa, Moskva-Almatı və Moskva-Yerevan istiqamətləri — ləğv edilib. Şirkət ləğvlərin səbəblərini açıqlamasa da, sərnişinlərə məlumatları rəsmi kanallardan izləmələri tövsiyə olunur.

Rusiya mediasının yazdığına görə, "Aeroflot"un baş direktorunun 2022-ci ildən bəri parol dəyişmədiyi və şirkət şəbəkəsində hələ də Windows XP və Server 2003-dən istifadə olunduğu bildirilir.

N.Təbrizli