Bakı ilə İrəvan arasında sülh Mərkəzi Asiya üçün vacibdir -ABŞ senatoru

Azərbaycan və Ermənistan arasında sülh sazişi Mərkəzi Asiya üçün mühüm geosiyasi əhəmiyyət kəsb edir. ABŞ-ın Montana ştatından senator Stiv Deyns bəyan edib.

Senatın Xarici Əlaqələr Komitəsində keçirilən dinləmələrdə çıxış edən Deyns bildirib ki, ABŞ-ın rəqibləri Vaşinqtonun region ölkələri ilə güclənən əməkdaşlığını zəiflətməyə çalışırlar.

“Prezident Donald Trampın iştirakı ilə Azərbaycan və Ermənistan arasında imzalanmış sülh sazişi Mərkəzi Asiya üçün əhəmiyyətli geosiyasi nəticələrə malikdir,” — senator vurğulayıb.

O əlavə edib ki, ABŞ “əvvəlki administrasiyadan yeni səhifə açır” və diqqəti real investisiyalara, habelə Mərkəzi Asiya ölkələri ilə daha sıx əməkdaşlığa yönəldir.

Deynsin sözlərinə görə, bu ölkələrlə möhkəm əlaqələrin qurulması ABŞ-ın milli təhlükəsizliyi və strateji əhəmiyyətli regionda mövqelərinin güclənməsi üçün həlledicidir.

N.Təbrizli