Əliyev Macarıstanın Baş naziri Viktor Orbana təbrik məktubu göndərib

Azərbaycan Prezidenti İlham Əliyev Macarıstanın milli bayramı münasibətilə Baş nazir Viktor Orbana təbrik məktubu ünvanlayıb. Bu barədə Prezident Administrasiyası məlumat yayıb.

Dövlət başçısı məktubunda Macarıstan xalqını səmimi qəlbdən təbrik edib və iki ölkə arasındakı münasibətlərin yüksək səviyyədə olmasından məmnunluğunu bildirib. “Dost ölkə və strateji tərəfdaşımız olan Macarıstanla dövlətlərarası əlaqələrimizin bugünkü səviyyəsi məmnunluq doğurur", — məktubda qeyd olunub.

Əliyev enerji sahəsində səmərəli əməkdaşlığın və siyasi dialoqun intensivliyinin münasibətlərin dərinləşməsinə xidmət etdiyini vurğulayıb. O, həmçinin Türk Dövlətləri Təşkilatı çərçivəsində əməkdaşlığın əhəmiyyətini qeyd edərək, bu il Budapeşt və Qəbələdə keçirilən zirvə görüşlərinin birliyin güclənməsinə töhfə verdiyini xatırladıb.

Prezident məktubunda Macarıstanın Baş nazirinə möhkəm cansağlığı, fəaliyyətində uğurlar, dost Macarıstan xalqına isə rifah və əmin-amanlıq arzulayıb.