NATO ölkələrinin 15 səfirindən ibarət nümayəndə heyəti Azərbaycana səfər edəcək

NATO-ya üzv 15 ölkənin səfirlərindən ibarət nümayəndə heyəti noyabrın 6–7-də Azərbaycana səfər edəcək. Bu barədə diplomatik mənbələr “Report”a bildiriblər.

Səfərin məqsədi Azərbaycanla NATO arasında əməkdaşlıq məsələlərinin, eləcə də regional təhlükəsizliklə bağlı mövzuların müzakirəsidir.

Sentyabrın əvvəlində NATO-da akkreditə olunmuş bir qrup səfir Ermənistana səfər etmiş, orada prezident, baş nazir və müdafiə naziri ilə görüşlər keçirmişdi. Həmin səfər zamanı tərəflər Ermənistan–NATO tərəfdaşlığı, regional təhlükəsizlik və demokratik dayanıqlılıq məsələlərini müzakirə etmişdilər.

Azərbaycan 1994-cü ildən NATO-nun “Sülh naminə tərəfdaşlıq” proqramının iştirakçısıdır. Tərəflər təhlükəsizlik, müdafiə islahatları və sülhməramlı əməliyyatlar sahəsində əməkdaşlıq edir.