Tramp və Si Cinpin yaxın günlərdə görüşəcək

ABŞ və Çin yeni ticarət sazişi çərçivəsində əsas prinsiplər üzrə razılığa gəliblər. ABŞ Maliyyə naziri Skott Besant bildirib ki, iki ölkə liderləri – Donald Tramp və Si Cinpin – məsələni bu həftə Cənubi Koreyada keçiriləcək görüşdə müzakirə edəcəklər.

Besant CBS telekanalına müsahibəsində bildirib ki, razılaşmaya TikTok-un ABŞ seqmenti üçün “yekun razılaşma”, həmçinin Çindən nadir torpaq metallarının ixracına nəzarətin gücləndirilməsinin təxirə salınması daxildir.

Nazir əlavə edib ki, tərəflər “iki lider üçün əsaslı çərçivə razılaşması əldə ediblər” və “tariflərdən qaçınılacaq”. Pekin tərəfi danışıqları “konstruktiv” adlandıraraq bildirib ki, tərəflər “narahatlıqların həlli yolları ilə bağlı əsas konsensusa” nail olublar və konkret detallar üzrə müzakirələri davam etdirmək barədə razılaşıblar.

Tramp və Si Cinpinin cümə axşamı günü Cənubi Koreyada görüşəcəkləri gözlənilir.

ABŞ və Çin arasında son illərdə texnologiya və nadir torpaq elementlərinin ixracı sahəsində gərginlik artıb. Vaşinqton Pekini yüksək texnoloji məhsullar üzrə ədalətsiz rəqabət və milli təhlükəsizlik risklərində ittiham edir. 2024-cü ildə ABŞ Çin mənşəli texnologiyalara bir neçə yeni məhdudiyyət tətbiq etmişdi.

Gülnar