Hüseynov: Azərbaycan sülh və barış proseslərinin fəal iştirakçısına çevrilib

Azərbaycanın son illərdə həyata keçirdiyi xarici siyasət ölkənin regional və qlobal sabitliyə töhfə verən əsas aktorlardan birinə çevrilməsini təmin edib. Bunu Sosial Tədqiqatlar Mərkəzinin sektor müdiri İlyas Hüseynov  noyabrın 5-də Bakıda keçirilən XXI əsrdə dövlət suverenliyi və milli konstitusiyalar: qlobal çağırışlar, tendensiyalar və perspektivlər — “2025: Konstitusiya və Suverenlik İli” çərçivəsində beynəlxalq elmi-praktiki konfransda çıxışı zamanı bildirib.

Onun sözlərinə görə, Zəfər yolu yalnız hərbi əməliyyat baxımından deyil, həm də peşəkar strateji planlaşdırmanın nümunəsi kimi qiymətləndirilməlidir.

“Azərbaycan Ordusu 2020-ci ildə müharibə aparmaqla yanaşı, siyasi, diplomatik və informasiya cəbhəsində də balanslı və məqsədyönlü fəaliyyət göstərdi. Bu, dövlətin hərbi əməliyyatları sülh strategiyası ilə uzlaşdırmaq bacarığının göstəricisidir", - o deyib.

Hüseynov qeyd edib ki, regiondakı geopolitik reallıqlar Suriya böhranı və daha sonra Qəzza–Həmas müharibəsi ilə dəyişsə də, Azərbaycan bu proseslərə daim barış tərəfdarı mövqedən yanaşıb.

“Yaxın Şərqdə Suriya rejiminin devrilməsindən sonra formalaşan yeni diplomatik kontaktlar Qəzza hadisələrindən sonra da davam edib. Barış masasında artıq Azərbaycan Prezidenti də var idi. Bu, ölkəmizin beynəlxalq nüfuzunun və vasitəçilik imkanlarının göstəricisidir", - Hüseynov deyib. 

Onun fikrincə, Azərbaycanın bu gün apardığı çoxşaxəli xarici siyasət həm regionun təhlükəsizliyinə, həm də qlobal diplomatik əməkdaşlığa töhfə verir.

“Azərbaycan artıq təkcə enerji ixrac edən deyil, həm də sülh ixrac edən ölkədir. Biz həm Qafqazda, həm də daha geniş coğrafiyada sabitliyin təminatçısına çevrilmişik", - o bildirib. 

Gülnar Nazimqızı