Azərbaycanın Qarabağdakı qələbəsi ədalətin və inamın zəfəridir - Pakistan baş naziri

Azərbaycanın zəfəri “ədalətli bir mübarizənin şanlı təsdiqi” və “suverenliyi uğrunda mübarizə aparan xalqlar üçün ümid işığıdır. Bunu Pakistanın Baş naziri Bakıda keçirilən 44 günlük Vətən müharibəsində qazanılan Qələbənin beşinci ildönümünə həsr olunmuş hərbi paradda çıxış edərək bildirib.

“Azərbaycanın cəsur oğulları mənim əziz qardaşım Prezident İlham Əliyevin cəsarətli və uzaqgörən liderliyi ilə tarix çağırışına cavab verdilər və doğma Qarabağ torpaqlarını azad etdilər,” — o bildirib.

Baş nazir vurğulayıb ki, Pakistan “qardaş Azərbaycanla bir qayada kimi dayanıb və hər zaman onunla olacaq.”

O, Prezident İlham Əliyevin “müdrik diplomatiyası” nəticəsində Ermənistanla “ləyaqət və qarşılıqlı hörmət əsasında” sülhün əldə olunduğunu deyib və qeyd edib ki, “həqiqi zəfərlər yalnız döyüş meydanında deyil, həm də sülh və anlaşma körpüləri qurmaqda qazanılır.”

Baş nazir Türkiyə Prezidenti Rəcəb Tayyib Ərdoğanın “vizyoner liderliyini” alqışlayaraq, onun Türkiyəni “müasir, strateji və iqtisadi gücə malik dövlətə çevirdiyini” bildirib.

O, həmçinin ABŞ-ın sabiq Prezidenti Donald Trampın Pakistan və Hindistan arasında sülhün bərpasında “qətiyyətli və cəsarətli liderliyinə” görə təşəkkür edib.

“Bu gün ordularımızın Azərbaycan və Türkiyə qardaşlarımızla yanaşı addımladığını, səmanın JF-17 Thunder qırıcılarının gurultusu ilə titrədiyini görmək qürurvericidir — bu, əbədi dostluğumuzun rəmzidir,” — o vurğulayıb.

Nitqinin sonunda Baş nazir Azərbaycanın şəhidlərini yad edib, onların “qanı ilə yoğrulmuş torpaqlarda açan xarıbülbül çiçəklərinin” sülh və ümidin simvoluna çevrildiyini söyləyib.

N.Təbrizli