Paşinyan Azərbaycanla danışıqlara dair sənədləri dərc edəcək

Ermənistanın baş naziri Nikol Paşinyan ilin sonuna qədər Azərbaycanla aparılan danışıqlara dair sənədlər paketini dərc edəcəyini açıqlayıb.

O, bu qərarın ATƏT-in Minsk Qrupunun ləğv prosesi ilə bağlı olduğunu bildirib.

“Proses başa çatdıqdan sonra bu sənədlərin dərc olunmasına mənəvi və siyasi maneə qalmayacaq”, –  Paşinyan jurnalistlərə deyib.

Baş nazir həmçinin sabiq prezident Serj Sarkisyanın başqa bir ölkənin rəhbərinə göndərdiyi məktubu da açıqlayacağını təsdiqləyib.

Onun sözlərinə görə, həmin sənədin məxfilik statusu hazırda aradan qaldırılır.

Sarkisyan daha əvvəl iddia etmişdi ki, 2019-cu ildə ATƏT-in Minsk Qrupu Qarabağla bağlı yeni sənəd hazırlamışdı.

O, bu sənədi əvvəlcə “qəbuledilməz” hesab etdiyini, lakin sonradan danışıqların əsasına çevrilə biləcəyini düşünməyə başladığını demişdi.

N.Təbrizli