Ağdaşda iki həkim hərbi xidmətə yararsız gənci yararlı kimi sənədləşdirdiyi üçün cərimələnib

Ağdaş Rayon Məhkəməsi noyabr ayında iki həkimi hər biri 2 min manat cərimə ilə cəzalandırıb. Həkimlər çağırışçı S.Behbudovun (2006-cı il təvəllüdlü) “Öd kisəsinin polipozu” diaqnozunu nəzərə almayaraq onu hərbi xidmətə yararlı kimi sənədləşdiriblər. Bu barədə Qafqazinfo məlumat verib. 

19 yaşlı gənc Cəbrayıldakı hərbi hissədə xidmətə başlayıb, lakin kəskin ağrılar səbəbindən Dövlət Sərhəd Xidmətinin hospitalında bir ay müalicə olunub. Bu ilin yanvarında S.Behbudov “Sülh dövründə hərbi xidmətə yararsız, müharibə dövründə məhdud yararlı” hesab edilərək Silahlı Qüvvələrdən tərxis olunub.

İşə səbəb olan həkimlər Ağdaş Rayon Mərkəzi Xəstəxanasının şüa diaqnostikası üzrə həkimi S.K (1960) və həkim-terapevt M.M (1954) olub. Onlara Cinayət Məcəlləsinin 314.1-ci maddəsi – səhlənkarlıq üzrə iş açılıb.