ABŞ Maduronun sürgün ediləcəyi ölkələri müzakirə edir — variantlar arasında Azərbaycan da var

ABŞ administrasiyası Venesuela prezidenti Nikolas Maduro və onun yaxın çevrəsinin hansı ölkəyə sürgün oluna biləcəyini müzakirə edir. Bu barədə Politico bir neçə dövlət rəsmisinə istinadən xəbər verib.

Məlumata görə, mümkün istiqamətlər sırasında Azərbaycan, Kuba, Rusiya və Türkiyə var.

Prezident Donald Trampın köməkçiləri Maduroya “təhlükəsiz çıxış” təmin edilməsini təklif edir, digərləri isə onun həbs olunaraq ABŞ-da məhkəməyə verilməsinin tərəfdarıdır.

ABŞ rəsmiləri həmçinin anti-narkokartel əməliyyatları fonunda mümkün hərbi təzyiqlərin Venesuelada daxili qarşıdurma yaradacağı və Maduronun hakimiyyətdən uzaqlaşmasına səbəb ola biləcəyini qiymətləndirir.

Vaşinqton keçid hökumətinin təhlükəsizliyini təmin etmək üçün üçüncü ölkələrdən özəl mühafizə şirkətlərinin cəlb edilməsini də nəzərdən keçirir.

Müzakirələr Dövlət Departamenti, Müdafiə Nazirliyi, Enerji Nazirliyi, Maliyyə Nazirliyi, Ədliyyə Nazirliyi və digər qurumlarda aparılır.

Politico-nun məlumatına görə, ABŞ təkcə müxalifətlə deyil, Venesuelada digər nüfuzlu şəxslərlə də əlaqə saxlayır.

Bu fonda The Atlantic yazıb ki, Maduro amnistiya, onun tutulmasına görə qoyulmuş mükafatın ləğvi və rahat sürgün təmin edildiyi təqdirdə istefaya getməyə hazırdır.

ABŞ Ədliyyə Nazirliyi onu 2020-ci ildə narkoticarətdə iştirakda ittiham etmişdi; 2025-ci ilin avqustunda Maduronun tutulmasına görə mükafat $15 milyon-dan $50 milyon-a qaldırılıb. Tramp isə bu ay “Maduronun prezidentliyinin sonuna yaxınlaşdığını” bəyan edib.

N.Təbrizli