“Megastore” mağazında satılan “batonçik” konfetindən qurd çıxdığı iddia olunur

Qubada yerləşən “Megastore” mağazasında satışda olan “Batonçik” adlı konfet məhsulunun içərisindən qurd çıxdığı iddia edilib. Bu barədə vətəndaş Abu Turabov sosial şəbəkə hesabında məlumat yayıb.

Turabov bildirib ki, istifadəyə yararsız və istifadə müddəti keçmiş məhsulların satışda olması alıcıların sağlamlığı üçün ciddi təhlükə yaradır. Onun sözlərinə görə, bu cür hallar mağazalarda məhsullara nəzarətin zəif olduğunu və məsuliyyətin yetərincə təmin edilmədiyini göstərir.

“İnanırıq ki, məsələ məsuliyyətlə araşdırılacaq və alıcı məmnuniyyəti təmin ediləcək,” — o qeyd edib.

Şikayətçi anews.az-a açıqlamasında bildirib ki, məhsulu 2 gün əvvəl alıb. O ehtimal edir ki, vaxtı keçmiş məhsullar yeni məhsullarla qarışdırılaraq satışa çıxarıldığı üçün bəzi konfetlərin içindən qurd çıxması baş verib.

Məsələ ilə bağlı “Megastore” mağazasının Quba filialı ilə əlaqə yaratmağa cəhd etsək də, zənglərimiz cavabsız qalıb. Mağazanın mövqeyini işıqlandırmağa hazır olduğumuzu bildiririk.

Azərbaycan Qida Təhlükəsizliyi Agentliyi isə sorğumuza cavab olaraq qeyd edib ki, məsələ araşdırılması üçün aidiyyəti üzrə nəzarətə götürülüb.

Aytac Zeynalova