Dövlət Neft Fondundan dövlət büdcəsinə transferlərin həcmində 11,4% azalma olacaq

2026-ci il Dövlət Neft Fondundan (ARDNF) dövlət büdcəsinə transfertlərin həcmi 11,4% azalacaq. Bunu deputat Azər Əmiraslanov büdcə layihəsinə münasibət bildirərkən deyib.

Deputat deyib ki, xərclərin artırılması hər zaman rifaha səbəb olmur və beynəlxalq təcrübə də bunu göstərir.

Onun sözlərinə görə, yeni büdcə zərfi vergi yükünün artırılmasını deyil, qeyri-neft sektorunun inkişafına təkan verərək büdcə dayanıqlığını möhkəmləndirməyi hədəfləyir.

Əmiraslanov qeyd edib ki, büdcənin həcminin böyüməsi sadəcə vergi dərəcələrinin artırılması ilə deyil, iqtisadi aktivliyin genişləndirilməsi, istehsal və xidmət sahələrinin gücləndirilməsi hesabına mümkün olmalıdır.

 Azərbaycan büdcəsi son illərdə böyük ölçüdə ARDNF transfertlərindən asılı olub. Hökumət bu asılılığı azaltmaq və gəlirləri şaxələndirmək üçün 2025–2026-cı illər üzrə fiskal çərçivədə qeyri-neft sektorunda vergi bazasının genişləndirilməsi, rəqəmsal iqtisadiyyatın stimullaşdırılması və kölgə iqtisadiyyatının azaldılmasını prioritet elan edib.

Gülnar Nazimqızı