“Şabalıd işi”media üçün qapadılıb - Məhkəmə

Azərbaycanın Fövqəladə Hallar Nazirliyində çalışmış kapitan Ayaz Bayramovun adı keçən və təxminən 3 milyon manat dələduzluq ittihamları ilə bağlı məhkəmə prosesi media üçün qapadılıb. Bu barədə Qafqazinfo məlumat yayıb.

General-mayor Raul Zeynalovun da işə adı qarışıb.

Məhkəmədə hakim, zərərçəkmiş şəxslərin istəyi ilə jurnalistlərin iştirakına icazə verməyib.

Zərərçəkmişlər – FHN-in polkovnik-leytenantı Yasin Muradov və Kəmalə Əliyeva – təqsirləndirilən şəxsin külli miqdarda pulları ələ keçirdiyini şəxsi məsələ kimi qiymətləndiriblər.

Proses zamanı Bayramov, zərərçəkmişlərin Raul Zeynalovun sifarişi ilə hərəkət etdiyini iddia edib və zərərçəkmişlərlə mübahisəyə girib. Növbəti iclasda general Raul Zeynalov məhkəməyə çağırılacaq.

Ayaz Bayramov Fövqəladə Hallar Nazirliyində çalışıb və idarənin rəis müavini olmuş general Raul Zeynalov, idarənin daha iki zabiti və başqa 6 nəfərin pulunu dələduzluqla ələ keçirməkdə ittiham olunur. Bayramov bir neçə gün əvvəl istintaq təcridxanasından göndərdiyi 28 vərəqlik məktubda həbsinə görə Zeynalovu günahlandırıb və işdən çıxarılmasının səbəbini onun hərəkətlərinə bağlayıb.