Son yeddi ildə STM 171 sorğu keçirib - Rəsmi

Sosial Tədqiqatlar Mərkəzi (STM) 2019–2026-cı illər ərzində ölkənin 14 iqtisadi rayonunu və 153 200 respondenti əhatə edən 171 sosioloji sorğu (161 yerli, 10 beynəlxalq) həyata keçirib. Eyni dövrdə keyfiyyət əsaslı tədqiqatlara təxminən 600 respondent cəlb edilib.

STM-in açıqlamasına görə, beynəlxalq təcrübədə beyin mərkəzlərinin əsas güclü tərəfi “knowledge translation” – elmi biliklərin siyasət dilinə çevrilməsi bacarığıdır.

Mərkəz bu funksiyanı analitik hesabatlar, təhlil və arayış sənədləri, həmçinin ictimai rəy əsaslı tədqiqatlar vasitəsilə həyata keçirir.

Hazırlanan sənədlər dövlət idarəçiliyinin elmi əsaslarla təkmilləşdirilməsi, ictimai proseslərin əhatəli öyrənilməsi və qərarqəbuletmə prosesinin rasional məlumat bazası ilə təmin edilməsi məqsədini daşıyır. STM-in analitik məhsulları yalnız mövcud vəziyyətin təsviri ilə kifayətlənmir, həm də sosial proseslərin dinamikası, struktur xüsusiyyətləri və perspektiv inkişaf istiqamətlərini müəyyənləşdirir.

2019–2026-cı illər ərzində STM əməkdaşları tərəfindən 160-dan çox analitik hesabat və 900-dən çox arayış, təhlil və təklif sənədi hazırlanıb. Bundan əlavə, 2019-cu ildə təsis edilmiş beynəlxalq redaksiya heyətinə malik “Sosial tədqiqatlar” jurnalı hesabat dövründə 5 sayı çap olunub.

STM vurğulayır ki, mərkəzin analitik fəaliyyəti sistemli elmi yanaşma, metodoloji ardıcıllıq və nəticəyönümlü təhlil prinsipləri üzərində qurulub və hazırlanan sənədlər həm elmi-analitik, həm də tətbiqi idarəetmə baxımından əhəmiyyətli mənbə rolunu oynayır.

Sosial Tədqiqatlar Mərkəzi 2018-ci ilin fevralın 8-də Prezidentin fərmanı ilə yaradılıb. Mərkəzin sədri deputat Zahid Orucdur. 

Sosial Tədqiqatlar Mərkəzi Azərbaycanda ictimai rəyin öyrənilməsi, sosial və iqtisadi məsələlər üzrə sorğuların aparılması və təhlil edilməsi ilə məşğul olan elmi-tədqiqat qurumudur. Mərkəz dövlət strukturları, beynəlxalq təşkilatlar və özəl sektor üçün sosial və iqtisadi göstəricilərin öyrənilməsinə dair hesabatlar hazırlayır, siyasət və proqramların effektivliyini qiymətləndirir. STM həmçinin sorğu metodologiyalarının tətbiqi, məlumatların emalı və analitik nəticələrin təqdim edilməsi sahəsində fəaliyyət göstərir.

Gülnar Nazimqızı