BDYPİ hava şəraiti ilə əlaqədar hərəkət iştirakçılarına müraciət edib

Baş Dövlət Yol Polisi İdarəsi (BDYPİ) sentyabrın 21-də gözlənilən hava şəraiti ilə əlaqədar hərəkət iştirakçılarına müraciət edib.

Müraciətdə ölkənin bəzi dağlıq və dağətəyi rayonlarında yağışın ayrı-ayrı yerlərdə leysan xarakterli olacağı, şimşək çaxacağı və dolu düşəcəyi bildirilib.

Qeyd olunub ki, gecə və səhər saatlarında dağlıq ərazilərdə duman müşahidə edilə bilər.

İdarə sürücüləri hava şəraitini nəzərə alaraq yollarda diqqətli olmağa çağırıb.

"Yağıntı zamanı yol örtüyünün sürüşkənləşməsi, görünüş məsafəsinin azalması və dağlıq ərazilərdə duman hərəkət təhlükəsizliyinə ciddi təsir göstərə bilər", – müraciətdə bildirilib.

Sürücülərə sürət həddini hava və yol şəraitinə uyğun seçmək, ara məsafəsini artırmaq, kəskin manevrlərdən və qəfil tormozlamadan çəkinmək tövsiyə olunub.

Həmçinin avtomobilin xarici işıq cihazlarından düzgün istifadə etmək, səfərdən əvvəl nəqliyyat vasitəsinin, xüsusilə şinlərin və şüşəsilənlərin texniki vəziyyətini yoxlamaq tövsiyə edilib.