Azərbaycan və İsveçrə XİN rəhbərləri Yaxın Şərqdəki vəziyyəti müzakirə ediblər

İsveçrə Konfederasiyasının federal xarici işlər naziri İqnasio Kasis Azərbaycan Respublikasının xarici işlər naziri Ceyhun Bayramova zəng vurub.Bu barədə Azərbaycan Xarici İşlər Nazirliyi məlumat yayıb.

Nazirlər beynəlxalq və regional təhlükəsizlik məsələləri, Yaxın Şərqdə mövcud vəziyyət ətrafında fikir mübadiləsi aparıb,mövcud gərginliyin daha da artmasının yolverilməz olduğu vurğulayaraq, böhranın dialoq və diplomatik vasitələrlə həllinin vacibliyi qeyd ediblər.

İsveçrə naziri Azərbaycana qarşı İran tərəfindən həyata keçirilmiş dron hücumu ilə bağlı həmrəyliyini ifadə edib,həmçinin İran ərazisindən İsveçrə vətəndaşlarının təxliyəsinə göstərilən dəstəyə görə Azərbaycana təşəkkür edib.

Tərəflər həmçinin Azərbaycan ilə İsveçrə arasında ikitərəfli əməkdaşlıq gündəliyinin mövcud vəziyyəti və inkişaf perspektivlərini müzakirə ediblər.