İlham Əliyev Tokayevi təbrik edib

Azərbaycan Prezidenti İlham Əliyev Qazaxıstan Prezidenti Kasım-Jomart Tokayevə ölkədə yeni Konstitusiya üzrə referendumun uğurla başa çatması münasibətilə təbrik məktubu göndərib.

Dövlət başçısı məktubunda Tokayevi və onun simasında qardaş Qazaxıstan xalqını səmimi-qəlbdən təbrik edib.

Prezident bildirib ki, referendumun nəticəsi – yeni Konstitusiyanın qəbulu Qazaxıstan xalqının birliyinin və milli iradəsinin bariz ifadəsi, həmçinin Tokayevə olan böyük etimadın göstəricisidir.
İlham Əliyev qeyd edib ki, siyasi sistemin modernləşdirilməsini və idarəetmə modelinin təkmilləşdirilməsini nəzərdə tutan bu mühüm hadisə Qazaxıstanın tarixində yeni mərhələnin başlanğıcını qoyacaq, ölkənin hərtərəfli inkişafına töhfə verəcək və beynəlxalq müstəvidə rolunu daha da gücləndirəcək.

Dövlət başçısı vurğulayıb ki, ortaq tarixə və zəngin mənəvi dəyərlərə əsaslanan Azərbaycan-Qazaxıstan əlaqələri, strateji tərəfdaşlıq və müttəfiqlik bundan sonra da birgə səylərlə inkişaf edəcək.

Prezident Tokayevə ali dövləti fəaliyyətində yeni uğurlar, qardaş Qazaxıstan xalqına isə əmin-amanlıq və firavanlıq arzulayıb.