Şuşada “Xarıbülbül” IX Beynəlxalq Musiqi Festivalı keçirilir

Şuşada Heydər Əliyev Fondu və Mədəniyyət Nazirliyinin birgə təşkilatçılığı ilə “Xarıbülbül” IX Beynəlxalq Musiqi Festivalı keçirilir.

Festivalın açılışı Cıdır düzündə “Mənim Azərbaycanım” rəqs kompozisiyası və bəstəkar Cahangir Cahangirovun “Cənnətim Qarabağ” əsərinin ifası ilə başlayıb. 

Festivalda Azərbaycanla yanaşı ABŞ, Qazaxıstan, Özbəkistan, Türkmənistan, Türkiyə və Yaponiyadan musiqi kollektivləri və solo ifaçılar iştirak edir. Tədbirin məqsədi mədəni əlaqələrin genişləndirilməsi, peşəkarlar arasında təcrübə mübadiləsi və gənc musiqiçilərin yaradıcılığının dəstəklənməsidir. 

Açılış konsertində Polad Bülbüloğlu, Tünzalə Ağayeva, Yusif Eyvazov, Uğur Işılak və digər ifaçılar səhnəyə çıxıblar.

Konsert proqramında həmçinin Azərbaycan Dövlət Rəqs Ansamblı, Üzeyir Hacıbəyli adına Azərbaycan Dövlət Simfonik Orkestri, Azərbaycan Dövlət Xor Kapellası, Qazaxıstanın “Turan” Etno-Folk Ansamblı, Özbəkistanın “Şodlık” Rəqs Ansamblı və Türkmənistanın “Qalkınış” Rəqs Ansamblı iştirak edib.