Bakı Enerji Həftəsində 45 ölkədən şirkətlər iştirak edəcək

Bakı Enerji Həftəsində bu il 45 ölkədən beynəlxalq və yerli şirkətlər iştirak edəcək, tədbir çərçivəsində enerji təhlükəsizliyi, “yaşıl enerji” və regional əməkdaşlıq məsələləri müzakirə olunacaq.

Bunu “Caspian Event Organisers” şirkətinin icraçı direktoru Bəhruz Hidayətzadə Bakı Enerji Həftəsi və “TransLogistica Caspian” sərgisinə həsr olunmuş mətbuat konfransında bildirib.

Onun sözlərinə görə, builki proqramda neft-qaz layihələri, bərpa olunan enerji mənbələri və investisiya imkanları da əsas mövzular sırasında olacaq.

Hidayətzadə qeyd edib ki, Bakı Enerji Forumu ilk dəfə iyunun 1-də Bakı Ekspo Mərkəzində açılacaq.

Forumun növbəti sessiyaları Bakı Konqres Mərkəzində keçiriləcək.

Tədbir çərçivəsində panel müzakirələri, təqdimatlar, inkişaf sessiyaları və müxtəlif sənədlərin imzalanması nəzərdə tutulur.
Eyni tarixlərdə “TransLogistica Caspian” sərgisi də keçiriləcək. Üç günlük sərgidə Azərbaycanla yanaşı, Rusiya, Türkiyə, Gürcüstan, Qazaxıstan, Özbəkistan, Lüksemburq və Litvadan şirkətlər iştirak edəcək.

Ağayeva bildirib ki, sərgi çərçivəsində yerli və xarici şirkətlərin iştirakı ilə B2B və B2C formatında görüşlər keçiriləcək.

Onun sözlərinə görə, iyunun 3-də ikinci Xəzər Beynəlxalq Nəqliyyat və Logistika Forumu təşkil olunacaq. Forum iki panel sessiyadan ibarət olacaq.

Birinci sessiyada nəqliyyat-logistika təchizat zəncirlərinin rəqəmsallaşdırılması və innovativ həllərin tətbiqi, ikinci sessiyada isə Orta Dəhliz beynəlxalq nəqliyyat marşrutunun inkişafı və perspektivləri müzakirə ediləcək.

Forumun təşkilatçısı “Caspian Event Organisers”, həmtəşkilatçısı isə Azərbaycan Nəqliyyat Ekspeditor Şirkətləri Assosiasiyasıdır.

Gülnar Nazimqızı