SOCAR Bahar yatağının tam yenidən işlənməsinə başlayıb - Babək Hüseynov

SOCAR SLB şirkəti ilə birlikdə Bahar yatağının tam yenidən işlənməsi proqramını həyata keçirir. Bunu SOCAR-ın hasilat üzrə vitse-prezidenti Babək Hüseynov bildirib.

Onun sözlərinə görə, Bahar yatağı uzun illər ərzində hasilatın davamlı azaldığı yataq kimi qiymətləndirilib.

“İndi biz bu yatağa yeni həyat veririk. Tam yenidən işlənmə proqramı həyata keçirilir. Biz etibarlı tərəfdaşımız olan SLB ilə əməkdaşlıq edirik”, - Hüseynov Bakı Enerji Həftəsində deyib.

O bildirib ki, şirkətin mütəxəssisləri hesablamalar aparıb, yatağın tam statik və dinamik modelini hazırlayıblar.

“Onlar elə rəqəmlər səsləndirirlər ki, açığı, həmin rəqəmlər məni belə təəccübləndirir. Söhbət həm neftdən, həm də qazdan gedir”, - SOCAR-ın vitse-prezidenti qeyd edib.

Hüseynov əlavə edib ki, SOCAR Bakını enerji mühəndisliyi, əməliyyat mükəmməlliyi, dəniz əməliyyatları üzrə ekspertiza və yüksək ixtisaslı neft-qaz kadrlarının mərkəzinə çevirməyi hədəfləyir.

Onun sözlərinə görə, SOCAR Tamar, Shah Deniz və Kot-d’İvuardakı Elei layihəsi də daxil olmaqla beynəlxalq upstream layihələrini genişləndirir.

“Upstream sektorunda növbəti dəyər mərhələsi həm yeni kəşflər, həm də mövcud yataqların yenidən qiymətləndirilməsi hesabına formalaşacaq”, - Hüseynov bildirib.


Gülnar Nazimqızı