Əfqan İsayev: SOCAR 2035-ci ilə qədər enerji şirkətinə çevrilməyi hədəfləyir

SOCAR 2035-ci ilə qədər yalnız neft-qaz şirkəti deyil, karbohidrogen və aşağı karbonlu bizneslərdən ibarət balanslaşdırılmış portfelə malik enerji şirkətinə çevrilməyi hədəfləyir.
Bu barədə SOCAR-ın vitse-prezidenti Əfqan İsayev Bakı Enerji Forumunda bildirib.

Onun sözlərinə görə, şirkət 2025-ci ildə kəşfiyyat və ümumi inkişaf strategiyasına yenidən baxıb.

Yeni strategiya üç əsas istiqamət üzərində qurulub: mövcud fəaliyyətlərin dekarbonizasiyası, təşkilati transformasiya və bərpa olunan enerji kimi aşağı karbonlu biznes sahələrinin inkişafı.

İsayev qeyd edib ki, aşağı karbonlu enerji sahəsində imkanların sıfırdan yaradılması uzun müddət tələb etdiyindən SOCAR beynəlxalq tərəfdaşlarla əməkdaşlıq yolunu seçib.

“Bu məqsədlə 2024-cü ilin martında SOCAR Green şirkətini yaratdıq. Masdar, BP, China Energy və Power China kimi tərəfdaşlarımızın dəstəyi ilə bərpa olunan enerji və enerji saxlama texnologiyaları sahəsində imkanlarımızı sürətlə inkişaf etdiririk”,- o bildirib.

SOCAR-ın vitse-prezidenti bildirib ki, şirkətin bərpa olunan enerji sahəsində növbəti prioritet istiqamətlərindən biri Azərbaycanın geotermal enerji potensialının araşdırılmasıdır.

Onun sözlərinə görə, Energetika Nazirliyi geotermal enerji layihələrinin inkişafı üçün normativ-hüquqi bazanın, tarif mexanizmlərinin və risklərin bölüşdürülməsi sisteminin formalaşdırılmasına dəstək verir.

“Geotermal enerji layihələri artıq 2025-ci ilin sosial-iqtisadi inkişaf proqramına daxil edilib və biz yaxın gələcəkdə bu potensialdan istifadə etməyə başlayacağımıza ümid edirik”, – İsayev vurğulayıb.

Əfqan İsayev həmçinin bildirib ki, SOCAR regionlararası elektrik enerjisi mübadiləsini nəzərdə tutan beynəlxalq layihələrdə iştirakda maraqlıdır və hazırda texniki-iqtisadi əsaslandırmaların nəticələrini gözləyir.

“SOCAR Gürcüstan, Türkiyə və bir sıra digər ölkələrdə fəaliyyət göstərir. Hesab edirik ki, həmin ölkələrdəki imkanlarımızdan istifadə etməklə bu layihələrin səmərəli və effektiv şəkildə həyata keçirilməsinə töhfə verə bilərik”, – o əlavə edib.

Gülnar Nazimqızı