Türk Dövlətləri Təşkilatının bank aktivləri 1,2 trilyon dollara yaxınlaşıb

Türk Dövlətləri Təşkilatına (TDT) üzv ölkələrin ümumi daxili məhsulu (ÜDM) 2,1 trilyon dollara çatıb ki, bu da dünya iqtisadiyyatının təxminən 3%-ni təşkil edir. Bu barədə İqtisadi Statistikanın Tədqiqat və Kommunikasiya Mərkəzinin icraçı direktoru Vüsal Qasımlı Türk Dövlətləri Təşkilatının maliyyə-bank sektoru üzrə keçirilən tədbirdə bildirib.

Onun sözlərinə görə, TDT ölkələrində iqtisadi artım orta hesabla 6% təşkil edir. Qırğızıstanda bu göstərici 11%-i, Özbəkistanda 7%-i, Qazaxıstanda 6,5%-i, Azərbaycanda isə 5%-i ötür.

Qasımlı qeyd edib ki, təşkilata üzv ölkələrin bank aktivləri artıq 1,2 trilyon dollara yaxınlaşıb və bu, dünya bank aktivlərinin təxminən 0,8%-nə bərabərdir.

Onun sözlərinə görə, TDT məkanında ümumi kredit portfeli də təxminən 670 milyard dollara çatıb ki, bu da qlobal kredit bazarının 2,3%-ni təşkil edir.

İcraçı direktor hesab edir ki, bu göstəricilər Türk Dövlətləri Təşkilatında maliyyə-bank sektorunun inkişafı və kapital bazarlarının genişlənməsi üçün böyük potensialın olduğunu göstərir.

Qasımlı bildirib ki, təşkilata üzv ölkələrdə maliyyə inteqrasiyasının dərinləşdirilməsi üçün tənzimləyici mexanizmlərin uyğunlaşdırılması, süni intellekt, blokçeyn, tokenizasiya və açıq maliyyə kimi yeni texnologiyaların tətbiqi xüsusi əhəmiyyət daşıyır.

Onun sözlərinə görə, Azərbaycan TDT çərçivəsində maliyyə və bank sektorunda əməkdaşlığın genişləndirilməsinə, rəqəmsal həllərin tətbiqinə və regional maliyyə inteqrasiyasının gücləndirilməsinə töhfə verməyə hazırdır.

N.Təbrizli